Nagkauyon karon ang mga lideres sa Caraga Region, apil na ang mga partido political ug kandidato sa lain-laing puwesto karong Mayo 2010, sa paghimong matinud-anon, tawhay ug way tikas ang gitakdang piliay.

Di pa dugay, gipirmahan sa mga lideres sa rehiyon covenant for Honest, Orderly and Peaceful Elections (HOPE) atol sa seremonya didto sa Urios University Gym.

Ang pirmahanay sa kasabotan, gisaksihan mismo sa líder sa Roman Catholic Church nga si Obispo Juan De Dios Pueblos, Northeastern Mindanao Police Regional Office 13 (PRO-13) Regional Director Chief Supt. Lino D. Calingasan, ug tag-as nga mga opisyales sa Commission on Election (Comelec) ug Caraga PRO 13 Press Corps.

“This is a good move to make next year’s election a noble one. I’m hoping that 2010 elections will be peaceful and orderly,” sulti ni Bishop Juan De Dios Pueblos, kinsa mao usab ang founding chair sa Caraga Conference for Peace and Development (CCPD).

Matud ni Heneral Calingasan, ang kasabotan pabor gayod sa tanang mga kandidato ug sa ilang mga botante.

Gipasabot sa report sa Philippine News Agency (PNA), ubos sa kasabotan, ang tanang mga lideres sa rehiyon, ilabi na ang mga kandidato motabang gayod aron masiguro ang usa ka malinawon, ug way kayagaw nga eleksyon sunod tuig pohon.

Read More...

Balor P10.4-milyon gyod nga mga Kalahi-Kalayaan sa Barangay Program (KBP) projects ang natapos di pa dugay sa Surigao City, matud sa report sa National Economic Development Authority (NEDA) ug sa military sa Caraga Region, nga gipatik usab sa Philippine News Agency (PNA).

Apil sa maong mga proyekto ang usa ka rehabilitated health center, duha ka bag-ong health centers, tulo ka bag-ong balay-tunghaan, duha ka potable water systems, ug duha ka farm-to-market roads nga nahimutang sa mga Barangay Mabini, Sukailang ug Mapawa, pulos sakop sa Surigao City.

Ang maong mga proyekto opisyal na nga gitunol ngadto sa Local Government Unit (LGU) niadtong Lunes, Disyembre 8, 2009.

Ang nahisgutang mga proyekto gihimo sa 544th Engineering Brigade sa Armed Forces of the Philippines (AFP) uban ang NEDA- Caraga, Provincial Government sa Surigao del Norte , ug LGU Surigao City.

2,000 ka mga panimalay ang gipaabot nga makapahimulos ning maong mga proyekto sumala sa report ni Regional Army Spokesman Maj. Mitchele B. Anayron, Jr.

Ang turn-over ceremonies gisaksihan mismo nila Gov. Robert Ace Barbers nga maoy miputol sa ribbon, uban nila ni Surigao City Mayor Alfonso Casurra, NEDA Caraga Assistant Regional Director Cecilia L. Rosales nga nagrepresentar kang NEDA-Caraga Director Carmencita S. Cochingco, ang RKCG designated Interim Chairperson; Lt. Col. Wenefredo O. Arceno sa 544th Engineering Brigade; Lt. Col. Cristobal N. Zaragoza, commander sa 30th Infantry Batallion ug uban pang opisyales gikan sa Department of the Interior and Local Government (DILG).

Ang kapitanes sa barangay maoy midawat sa “key of responsibility” isip mga custodian sa nahisgutang mga proyekto.

Ang maong mga proyekto tipik sa nagpadayong paningkamot sa gobyerno alang sa pag kab-ot sa kalinaw ug kahusay ug sa pagtunol ug mga proyekto sa kauswagan ngadto sa kabarangayan, ilabi na sa mga lugar nga apektado sa insurhensia.(PNA)

Read More...